Föstudagskvöldið 6. ágúst s.l. stóð Vatnajökulsþjóðgarður fyrir fræðslukvöldi um fiðrildi í Ásbyrgi þar sem Aðalsteinn Örn Snæþórsson líffræðingur og kennari hélt fræðsluerindi um fiðrildi í Gljúfrastofu og fór að því loknu með þátttakendur í gönguferð að Ási þar sem fiðrildagildran var tæmd með aðstoð ungra gesta.  

Vorin og fyrri hluti sumars er annasamur tími hjá Náttúrustofu Norðausturlands en á þeim tíma fara fram helstu fuglarannsóknir og -vaktanir sem stofan stendur fyrir. Verkefnin eru fjölbreytt og spanna stórt svæði á Norðausturlandi. Vegna þeirra anna og sumarfría hefur fréttasíða Náttúrustofu Norðausturlands legið niðri í allnokkurn tíma. Úr því fréttaleysi verður nú bætt og sagt stuttlega frá helstu verkefnum stofunnar í sumar.